Kerktoe

In die begin was daar ‘n kerk. 

Menige lewensverhaal van ‘n plek of ‘n mens begin so.

Vroeg in my lewe was daar ook ‘n kerk. ‘n Kleintjie. Dit was die rede vir Sondae se aktiwiteite, die gom van ‘n gemeenskap en die oorsaak van harde meningsverskille. Naweke is rondom kerksake beplan. Saam met die skool, polisiestasie, poskantoor, winkel, vendusiekrale, garage en vulstasie en gemeenskapsaal was die kerk die hartklop van die distrik. ‘n Eenvoudige versameling invloede tydens my vroeë vormingsjare.

Sommige naweke was daar grootkerk. Eintlik nagmaal. Voorbereidingsdiens Saterdagaand, Nagmaal Sondagoggend, Nabetragting Sondagnamiddag en Oordenking Sondagaand. Die dominees van daardie tyd het stamina gehad en gepraat soos ‘n roomafskeier. Party was hipnoties vervelig. Eers as jy die toets van eentonigheid geslaag het, het jy geseil deur die weeklange Pinkster-bidure.

Ek weet nog nie hoe die marathonsessies van destyds my gesmee het nie, want ek kan bitter min van daai boodskappe onthou. Die ritueel van kerktoegaan het my en my geslag waarskynlik net normatief beïnvloed. ‘n Soortgelykheid het onder ons ontstaan. As kind het ek sekere goed as reg en ander goed as verkeerd aangeleer. Iemand wat nie by die ongeskrewe reëls wou aanpas nie was teen die stroom. Dwars. Want daar was maar een pad. En een dogma.

Eers later in my lewe het ek besef dat kerktoegaan eintlik oor God en geloof gaan. Genadiglik kon ek toe die regte boodskap op ons kinders op ‘n vroeë stadium toepas, al het dit ook sy uitdagings gehad.

In die laat negentigs het ons gesin in Duitsland gewoon. Ter wille van ons gereformeerde wortels en die taalhindernisse was die Kerk van Skotland ons enigste werkbare opsie. Die gemeente was piepklein, ‘n samestelling van buitelanders, en ons dominee se naam was James Brown. Ons eredienste was in ‘n nederige onopvallende geboutjie, ten spyte van die menigte indrukwekkende stokou kerkgeboue rondom ons. Ons mede-gemeentelede was warm en meelewend. Ons kinders en ons het tuis gevoel.

Dit was nogal ‘n uitdaging om aan die kinders te verduidelik waarom die vele pragtige kerkgeboue van Europa so groot is en desnieteenstaande leeg staan. Waarom daar met soveel oordadigheid vroeër yslike tempels gebou is, maar nou amper nutteloos geword het.

So besoek ons eendag die Kölner Dom. ‘n Massiewe plek en ‘n bekende baken in Köln. Eintlik kan mens nie die 157 m hoë torings van die katedraal mis nie. So groot en kompleks is die gebou dat restourasie ‘n voltydse werk is. ‘n Belangrike monument van die Rooms-Katolieke kerk. Ons probeer die kinders stil hou en wys hulle die indrukwekkende brandskilderye en gekleurde vensters. En toe breek ons jongste die gewyde stilte deur kliphard te vra of ons nou in die Spur is.

Nou is ons op pad na hom toe in China. Ons wil ook graag saam met hom Paasfees vier. Dalk in ‘n kerkgebou.

Advertisements

Skrywer: oudoring

Married for 30 years to Sugnét. Two children. We call Namibia our home country, but travel currently as part of a sabbatical year.

5 thoughts on “Kerktoe”

  1. Hey Pierre hoe maak jy nou die nostalgie in my wakker! Dis mos Stampriet se kerkie op jou foto? Kannie onthou dat die bome so groot was nie?
    Blokfluit gespeel daar. Juf Julie Smit

    Liked by 1 person

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s