Die engel van Wenzhou

Wenzhou, die stad op die suidoostelike uithoek van die Zhejiang Provinsie in China, is al die afgelope 2,500 jaar ‘n belangrike hawestad. Tans woon hier sowat 9 miljoen mense in die metropool. Beskryf as China se Jerusalem, omdat die christelike geloof redelik sterk hier gevestig is, word Wenzhou ook beskou as die geboorteplek van China se private ekonomie. ‘n Hele paar Chinese topmaatskappye het Wenzhou-adresse. Die vervaardiging van tekstiele, plastiek, ligte elektriese ware, brille en verpakkingsmateriaal is die hartklop van die stad. Net ‘n kant-aantekening: Wenzhou word ook gereken as die geboorteplek van Chinese opera. En, ‘n hele rits gesaghebbende wiskundiges kom uit dié stad. Interessant, soos my skoonma sou sê.

Maar Wenzhou is nie ‘n toeriste-vriendelike stad nie. Enige taal behalwe Mandaryns is seldsaam. Inligting oor die stad is skraps en min moeite word gedoen om besoekers te laat welkom voel. Die welkomborde op Wenzhou stasie kon net sowel onderstebo of agterstevoor gehang het, ons weet nie. 

Die stad is ook nie besonder aantreklik nie. Dink aan daai vaal dogter in die agterste ry van die skoolkoor – onderbeklemtoon, lae profiel, randfiguur, beskroomd, teruggetrokke en eenkant. Min mense het al van haar en Wenzhou gehoor.

So val ons Wenzhou binne. Gewapen met Booking.com en Maps.me probeer ons verstaan hoe om by ons blyplek uit te kom. Om die busse se roetes en bestemmings te verstaan, vra ons raad by ‘n Chinese man met ‘n lang pinkienael. In uiters gebroke Engels beveel hy Bus 91 aan. 


Bus 91 begin ‘n eindelose rit met ons en spoeg ons by ‘n verdagte halte uit. Gelaai met ons rugsakke begin ons stap op Maps.me se roete. Die aanvanklike 800m word 2,4km en so kom die ekstra stukke by totdat ons omtrent 5km later voor ‘n dooie ingang staan. Moedeloos maal ons in die rondte. ‘n Groepie mense ontferm hulle oor ons, maar ons interaksie bly beperk tot gebaretaal. Later bel een sy vrou, wie Engels kan praat. Oor die foon verduidelik sy aan my dat die adres nie bestaan nie. 

Saam met Booking.com word Maps.me aangekla as onbetroubare reisgenote. Ons probeer ‘n laaste, onlogiese manier om ons bestemming te vind. Met die geduld tot op die dunste geskaaf hoor ons daai mooi woorde in Engels: “Can I help you?” 

Voor ons staan ‘n vriendelike engel wat ons later leer ken as Morgan. Ons verduidelik en hy en sy vriend bied aan om saam met ons die bestemming te vind. So stap ons nog ‘n kilometer. In ‘n dowwe, chaotiese straat vind ons die kamstige plek, met die naam in Mandaryns op ‘n digitale bord. 

Morgan sê onmiddellik dat ons nie hier moet bly nie. Op sy aanbeveling stap ons terug na ‘n ander adres – ‘n kilometer verder na ‘n hotel met marmervloere. En hy beding vir ons blyplek teen ‘n goedkoper prys as ons aanvanklike bespreking. Morgan en sy vriend help ons totdat ons sakke in ‘n deftige dubbelkamer is. Morgan stel voor dat ons net eers moet rus, maar dat ons die volgende aand moet kuier. 

En so het ons met die engel van Wenzhou vriende geraak. Om ‘n tafel gekuier en deeglike instruksies gekry om Yandang te besoek.

Yandang is ‘n geopark met loodregte rotse, watervalle en nou ravyne in een van die bergreekse rondom Wenzhou. Om daar uit te kom, moet mens gebruik maak van ‘n trein, ‘n driewiel en ‘n bus – en die hulp van ‘n paar tolke. Nogtans was ons besoek die moeite werd. 


Wenzhou is waarskynlik die enigste plek in die wêreld wat ontwikkel is op Fengshui beginsels. Hiervoor word ‘n man met die naam Guo Pu vereer. Die argitektuur en ontwerp van die stad neem deurgaans die topografie en omgewingskenmerke soos berge, riviere en vlaktes in berekening sodat die uitspansel, natuur en die menslike blyplek gebind word as ‘n geheel of kosmos. Dus, ‘n tipe holisme wat Guo “Qi” noem. 

Geen stedelike ontwikkeling word teen die hellings van die omringende berge toegelaat nie, riviere deurkruis die stad en word komplimenteer met talle bevaarbare kanale, daar is waterfront-ontwikkelings en dyke, die strate is wyd, en prominent-ontwerpte hoë geboue is so geplaas dat hulle as landmerke uit alle rigtings dien.

Moet mens ‘n draai maak in Wenzhou? As jy klere, materiaal, skoene, brille, ligte elektriese ware, verpakkingsmateriaal of plastiek wil aankoop – ja. As jy vir Yandang wil sien (en twee vlindertjies) – ja. As jy die droom van Guo Pu wil beleef – ja. As jy vir Morgan wil ontmoet – ja. Maar moenie met Booking.com ‘n plek bespreek nie. 

Advertisements

Skrywer: oudoring

Married for 30 years to Sugnét. Two children. We call Namibia our home country, but travel currently as part of a sabbatical year.

3 thoughts on “Die engel van Wenzhou”

    1. Jip, ek dink Booking.com vaar beter waar mens die roetes in enige westerse taal kan lees. Booking.com gee bloot n adres, maar geen beskrywing hoe om daar uit te kom nie. En enige adres in Mandaryns is n raaisel. Die kompetisie van Booking.com daarenteen, gee vir mens stap vir stap beskrywings van die roete en wat die beste manier is om by die bestemming uit te kom. Ons het Booking.com nog n kans gegee, en is ook n tweede keer teleurgestel. In Wenzhou is Booking.com nie die oplossing nie. En ook nie in Suzhou nie.

      Like

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s